4/23/2008 - Un poème sur une femme tunisienne..par Mehdi Hmili
مرا
بين يديها صغيرها
ودموعها حيار
تمشي و شعرها
هايج كي بحرغدار
قلبها جريح
صوتها ينادي عالريح
"راني كنت بنت دار..
البو بطال, وخمسة صغار
شكون يوكلهم؟
خرجوني مالقرايه
خليت صغري ورايه
و خدمت في المعامل
مالسبعه للسبعه
على مياة دينار
تموت بين الكراء
و كريدي العطار
الزهرماثماش
طردوني خاطرني نطقت
روحت جوانحي مقصوصه
مرسكيه في الكار
و قلت لروحي حتى لوقتاش
و الواحد رخيص مايسواش
لميت وجيعتي
وضعت بفاليجتي
في وسط البلاد
بين البيران والوكايل
ريت هوايل
و ظلموني العباد
وطحت مرا محروقه
بين الرماد
جعت,تعريت
من كثر ماترمدت
فديت
وقلت خليني نلقى واحد نحبو
فالآخر لقيت
زوالي كيفي
خدام حزام
مع بعضنا قلت نكونو
ومن جديد نبداو
بعدت عالحرام
وبعد شهور
بنتي في تحركت
فرحت..ومشيت نفرحو
لوجت عليه
مالقيتوش
خلاني للناس
ولكلامهم الي كالكرتوش
رجعوني للشارع
بالسيف علي
وينك يا ربي
كانك تسمع في
مهدي هميلي
باريس 2008
|
|
|
|
About Me
Ici..on parle poésie, cinéma, théâtre..Marhbé les tunisiens!!!!
Friends
|
